මැලේසියා යානයේ කළු පෙට්ටියේ සංඥා හසුවේ
අතුරුදන් වූ මැලේසියා යානයේ කළු පෙට්ටියෙන් නිකුත්වූවා යැයි සිතිය හැකි සංඥා කිහිපයක් චීන නෞකාවකින් ග්‍රහණය කරගෙන ඇත.
ශබ්ද සංඛ්‍යාත 37.5 ඔස්සේ නිකුත් වී ඇති මෙම සංඥා ග්‍රහණය කරගෙන ඇත්තේ හෙයික්සං 01 නමැති නෞකාවකිනි. පසුගිය දින කිහිපයේ යානය සෙවීමේ කටයුතු වඩාත් ව්‍යාප්ත කැරිණි. කළු පෙට්ටියේ බැටරි ආයුකාලය ඉතිරිව ඇත්තේ තව දින දෙකක් පමණක් බැවින් ඉන් පසු ගුවන් යානය සම්බන්ධයෙන් තොරතුරු සොයා ගැනීම අපහසු වනු ඇත.
ගුවන් යානයක කළු පෙට්ටිය ගැඹුරු ජලයේදීත් අධික තාපයේදීත් විනාශ වන්නේ නැත. ගුවන් යානයක සියළු දත්ත කළු පෙට්ටියේ සුරක්ෂිත බැවින් යානයට සිදුවූ දේ සොයා ගැනීමට එය වැදගත් උපාංගයකි. නියමු කුටියේ ශබ්ද, යානයේ ඇතුලත ශබ්ද සහ සියළු විධානයන් ද මෙහි අඩංගුය. චීන ගවේෂකයන් පවසන්නේ මේ සංඥාව නිකුත්වූයේ ඉන්දියන් සාගරයේ දකුණු කොටසේ කිලෝමීටර 5.8ක් පමණ ගැඹුරින් බවයි. එම ස්ථානය නිශ්චිතව සොයා ගැනීමට සාගරයේ වර්ග සැතපුම් 84,000ක පමණ ප්‍රදේශයක් ගවේෂණය කිරීමට සිදුවන බව ද පර්යේෂකයෝ කියති.
